諾諾的第三天 29 Feb 2012

第三天其實只係足48小時, 踏入第三日.  以為今日可以出院, 都未可以, BB 未出得住, 所以我都跟埋BB 一齊出. 今日兒科醫生報告, 抽左臍帶血, 所有嘢正常, 血型係O型, 同Daddy, Mommy 一樣.  不過開始有黃, 因為吸出黎既原故, 可能會再黃少少. 而且個頭仔會有個紅印同有少少腫起, 會自己退.  係, 醫生都有講過, 琴日餵奶都有留意到.  希望聽日可以一齊院啦.....


三日人仔, 個樣又有少少唔同了.

LJ

諾諾的第二天 28 Feb 2012

今日精神好左, 去左睇BB, 下午去餵奶.

生完之後, 第一次見到佢.  同睇相既唔同

LJ

諾諾的第一天 27 Feb 2012

歡迎你黎到呢個世界 黎到我地既身邊.

1

生完後去洗手間, 企起身, 整個人都冇氣有力 "蝕左道氣" 既感覺原來係咁. 第一日冇去睇BB 了.

LJ

寶貝諾出世了 27 Feb 2012

我既寶貝諾出世啦!!

第一晚係Mami 度, 食過雲尼拿甜筒後, 上床瞓覺.  到左半夜一點半, 朦朧間好似有d 嘢流出黎, 以為係分秘啦, 不過越黎越唔對路, 感覺有d 嘢仍然慢慢流出黎, 同平時既感覺唔同. 即刻起身去廁所, 一起身感覺到有嘢一路流, 沿住條腿一路向下流.  沖左入廁所, 企左係度,流到一地都係, o個刻黎唔切反應, 好驚...羊水仲有少少淺紅色, 個人定一定之後, 即刻坐係廁所, 大叫媽咪, 好彩six six 幫手吠, 如果唔係可能都聽唔到我大叫啦.....

成個人驚到震, 真係好驚呀, 又怕我既緊張, 全身震晒會影響肚入面既阿B...不停叫自己放鬆d, 但真係唔得, 不停震!!

嘈醒左Mami 同Dad.  之後我用水沖下身, 換衫, 換埋產婦巾巾, 打電話比老公! 老公係屋企即刻起身, 揸車出黎. 等緊老公時, d 水又流.... 好驚呀, 又沖入廁所等!! 於是 Mami 同我一齊落樓下, 老公好快就到! 去緊醫院途中, 冇肚痛, 但係有少少想痾既感覺, 應該係阿B 向下緊.

到左醫院(大約3點)一落車, 嘩!! 唔得啦, 一企起身, d 羊水又湧住流出黎, 一路行, 一路流, 流到一褲都係, 墊左產婦巾巾都冇用. 好驚!!! 之後上左3樓產科, 問晒資料, 簽名, 老公陪產, 換衫, check 度數(超痛!!未開, 有少少鬆), 聽BB 心跳. 阿B 好好瞓, 一路都唔郁, 推極個肚都唔醒. 差唔多四點左右, 開始有少少痛, 痛下停下, 有時仲會扯到條腰好酸痛. 等到阿B 有d 郁, 大約五點令, 再check 度數, check 度數真係堅痛, 唔知係唔係因為子宮後掘既原故? 有2度了. 姑娘問我聞唔聞氣, 我話唔駛聞, 我諗依家要聞氣, 再痛d 時咁點算.... 之後推左我入去待產, 痛密左, 不過可以忍, 唔係太痛, 打側瞓, 痛時就深呼吸, 一定要放鬆唔好亂用力, 係醫生講架, 咁樣會對子宮開得好d. 大約七點, 唔駛一陣又check 度數, 大約3度4度,  叫我入產房, 產房都唔細, 成間房都係我, 而且老公可以陪產了~~

入左產房, check 住我同BB 既心跳, 開左音樂, 感覺好好, 姑娘再次叫我聞氣, 話會對BB 同我都好, 因為笑氣有一半係氧氣, 一半有麻醉作用, 容易放鬆, 子宮會開得快d. 老公留意到, 當我吸左笑氣, BB 心跳會冇咁急. 當我真係吸既時候, 成個人好暈, 好似飲醉酒係張床到天旋地轉既感覺, 冇左知覺咁. 望下個鐘, 七點幾, 唔知阿B 會唔會係我地想佢既時間出世呢? 心諗... 可能唔會啦.... 應該未有咁快出世. 痛密左多左, 開始吸笑氣密左. 八點半醫生到左, 開到5度... 未得, 幫我吊鹽水(其實我都唔知係咩..... ). 醫生走左啦.... 老公又出左去泊返架車入醫院停車埸. 姑娘再次幫我check 度數, 6度了.  姑娘話叫返醫生返黎, 話我係頭一胎有醫生係度會安心d.  越黎越痛, 暈下暈下send SMS 比老公叫佢快d 返, 就生得啦! 姑娘幫我準備 set 好晒嘢, 著腳套, 有想用力痾既感覺! 老公好快泊好車, 醫生又返埋黎, 已經叫我生啦. 原來生個陣冇得聞氣, 心諗... 慘啦, 會痛死.... 一有痾既感覺我用力推, 唔知點解冇咩痛既感覺?? 只係想痾, 要用力推, 推左好耐都未得. 姑娘走過黎用力推我個肚, 醫生叫我等等唔好用力,  之後叫我用力推埋個身出黎. 咁就生左啦, 姑娘抱埋一邊清潔, 阿B 喊啦, 而且喊得好大聲 hahahahaaa!! 姑娘抱佢比我, 睇下仔定女. 跟住一齊影相, 我冇同阿B 講嘢, 剩係諗, 咁既, 個樣咁既?! 依定諗返, 應該同阿b 講下嘢.  事後下午, 兒科醫生report 返阿B 既情況, 先知原來佢係吸出黎架.... 即係我唔夠力先啦.

諾諾 27. Feb. 2012 早上出世啦!

當我收到醫院幫佢影既相時, 好開心, 但係個樣咁既... 好醜樣呀!!

諾諾好乖, 我生得一D 都唔辛苦, 而且好快, 好順利. 仲係我地想佢出世既日子同時間出世. 證明好多嘢都係整定! 冇十級痛, 環境同心理狀態都好好.  唔駛開刀, 幫我慳返d 錢, 而且身體可以恢復得快d.

好開心, 見到你健康出世. 希望你永遠都健康快樂!

LJ

放產假了

開始放產假, 前2後8.  放產假期間, 因為怕突然作動, 所以會留係Mami 度住, 等bb 出世


38週3日

第一晚係Mami 度瞓, 當晚瞓瞓下, 穿水啦!!

LJ

美心 Mini 栗子蛋糕

心血來潮好想食栗子蛋糕! 返到元朗, 買埋最後一個  . 返到屋企同老公一人一半食晒

好好食!!

LJ

順產定開刀??

距離預產期既日子越黎越近, 真係越黎越驚.  順產既痛, 好怕承受唔到. 好多人都話有十級痛, 痛到癲. 我已經有心理準備, 到時會痛到求生不得, 求死不能! 因為咁既原因, 想開刀啦....  反正都係開刀, 所以都問下邊個日子好d, 不過都知道應該冇位架啦... 基本上, 一有左就要決定順產定開刀, 如果唔係想book 都幾難.

問左醫生, 答案都係開刀既手術室已經full 晒啦. 唉.... 不如我地所料.  除非唔揀日子啦, 醫生會教我到時作動, 想改開刀. 

因為預產期係3月8號. 好驚阿b 會係2月29號出世, 以後生日都要4年一次啦.... 而且問過揀日子既先生. 2月29 & 3月1號, 出世同我地唔係幾夾. 最好係2月27號早上. 不過冇得我地揀, 手術室full 左, 就算真係可以開刀, 時間都唔輪到我地揀, 因為要當日手術室有空位先可以比我開刀. 所以Mami 話, 由阿b 自己揀邊日出世, 佢識揀既佢條命就好, 同我地有緣啦. 都係既.... 佢幾時出世係睇佢自己既做化同我地既緣份. 

LJ

mumomega 魚油丸

8個月先開始食, 係唔係遲左d 呢?

依落唔係好鐘意食. 每次食完, 'er" 返出黎既氣都有一陣既腥味. 所以依家都冇咩食, 放左係度.....

LJ

腐竹薏米糖水

32 週第一碗腐竹薏米糖水 from B 仔

LJ

BB 小小用品

部份bb 物資...

護協 - $25 一pack

最唔抵, 買貴左! $169 @ 元朗, 下次都唔會再o係o個間買, 聽講間嘢相對o係元朗都唔平, 話佢係黑店!

預備第一次Steam 奶樽


LJ

36w

36W 了, 醫生說阿B 已經有6.5磅 ! 加油呀! 比起33W 4.8磅, 真係重左好多.  醫生話唔好食太多甜嘢, 少d 澱粉質, 行多d. 因為怕阿B 太大隻, 會生得辛苦.

最後, 呢2個月, 瞓覺轉身時個肚特別重. 起身, 轉身恥骨亦都跟住痛. 每晚一定起身一次去洗手間, 唔可以一覺瞓到第2朝.  有時候, 一瞓上床胃酸倒流, 要坐一陣先可以瞓, 有時更坐到瞓著左....

9個月了, 開始有點怕. 怕~ 生產時既陣痛有幾耐, 傷口有幾痛.  曾想過做無痛分娩, 醫生亦說沒有副作用, 不過要比多1萬元 ~ 好貴啊!!! 呢個費用不是醫生收的. 其實止痛針有效嗎? 吸笑氣有用嗎? 我只係想到.... 痛! 想死既痛.... 可能係想像不到既痛!

阿B 一日比一日大, 聽到我大聲講嘢, 鬧人, 好自然會郁! 可能我太大聲, 佢唔鐘意.... 依家已經係一個小BB 啦! 每當感覺到阿B 郁, 轉身, 我都會諗到出左世既BB仔, 周身郁, 好得意.

依家要盡快整理好阿B  既物品, 衫仔! 真係要  ready 好了!!

LJ

印模牛油曲奇

(做出400g曲奇餅份量, 塊數視乎模的大小而定)
材料: 牛油 100g

糖粉/糖霜/粉砂糖 (Icing sugar) 80g

幼鹽 少許

蛋黃 1個

低筋麵粉 200g

烹調步驟:

(1) 事前準備牛油, 雞蛋置室溫中退冰備用 (約1小時) (2) 用電動攪拌機將牛油打約2分鐘成軟滑忌廉狀
(3) 加入糖粉和幼鹽打約5分鐘至變白又輕軟, 飽含空氣
(4) 加入蛋黃攪拌至完全均勻
(5) 加入1/3低筋麵粉, 用慢機攪勻
(6) 加入餘下的低筋麵粉, 用刮刀以切拌法 (fold-in) 拌勻
(7) 放入保鮮袋, 用手輕輕揉成粉糰, 置雪櫃冷藏15分鐘
(8) 取出後剪開保鮮袋, 隔着袋用麵棍擀平約3mm厚度
(9) 用曲奇模吸出形狀
(10)放入已預熱180度的焗爐內焗約12-15分鐘至表面金黃
(11)放鐵架上待涼即成

小貼士:

所有材料要預先存放在室溫至完全退冰, 可避免蛋糊與油脂分離, 影響曲奇的鬆脆程度